Skibsassistentiuguit skibsassistentitut misilittagaqanngitoq sivikinnerpaamillu qaammatini arfinilinni umiartorsimasutut søfartsbogimi allagartaatigigukku, skibsassistentitut naggataamik pikkorissaarnissamut qinnuteqarsinnaavutit.

Qinnuteqarfissaq: 15.maj 2025

Atuarneq tulleq aallartissaaq: 30.07. 2025

Ilinniartitaanerup normua: 242011

Qinnuteqarnissamut immersuiffissaq: Inuussutissarsiutitigut ilinniartitaanermut qinnuteqarit

Sivisussuseq: Nuummi sapaatit akunnerini 20-vit.

Suliassaqarfiit:

Umiarsuarmi ikiorti umiarsuup qaavani maskiinaqarfimmilu suliassat tamaasa suliarisarpai. Skibsassistentitut aquttarfimmi maskiinaqarfimmilu pigaartut, aquttut, usilersornissamut piareersaasut usilersuisullu ikiortassavatit. Aamma kranilerinermi, pituttuinermi umiarsuup maskiinaanik pingaarnermik tapertaasunillu atortorissaarutinillu allanik aserfallatsaaliuinerni ikiuuttassaatit. Eqqiaaqataallutillu aserfallatsaaliueqataasassaatit isumannaallisaanermilu, soorlu røgdykkeritut, peqataasarlutit.

Piumasaqaatit:

Skibsassistentitut naggataamik pikkorissaqataassaguit skibsassistentinut misilittagaqanngitsunut grundmoduli ilinniarfigereersimassavat sivikinnerpaamillu qaammatini arfinilinni umiartorsimallutit.

Tamatuma kingorna skibsassistentitut misilittagalittut umiartulissagaanni skibsassistentitut misilittagaqanngitsutut suli qaammatini arfinilinni umiartoqqaartariaqarpoq.

Ilaatigut uku ilinniarneqassapput: Imaani isumannaalllisaaneq, ikuallattumik qamisaaneq, pigaartuuneq, sumiissusersiorneq, umiartortuuneq, umiarsuup qaavanik maskiinanillu aserfallatsaaliuneq, maskiinat innaallagiarlu pillugit ilinniarneq, værkstedsteknik ikiueqqaarnerlu.

Nalunaarut tunngaviusumik imaani ilinniartitaaneq (GMU):  https://www.retsinformation.dk/eli/lta/2021/2311

Ilinniaqqinnissamut periarfissat:

Skibsassistentitut misilittagalittut ilinniaqqinnissamut periarfissarpassuaqarpoq, pikkorsarnerit sivikinnerusut ilinniarnerilu sivisunerusut.

Amerlasuut “Inuussutissarsiutigalugu angallassinermut pikkorissarneq” aamma radiomik pikkorissarneq “ROC”, sapaatit-akunnerinik sisamanik sivisussusillit, ingerlaqqissutigisarpaat. Taakku pikkorissarfigisimagaanni skibsassistentitullu misilittagaqartuugaanni umiarsuit 200 bruttotonit tikillugit aquttuuffiusinnaapput.

Aamma sumiissusersiornermik ilinniarfimmi ilinniartoqarsinnaavoq kystskipperitullu, sætteskipperitut umiarsuulluunniit naalagaatut ilinniarluni.

Teknikkimut tunngasortaa soqutiginerugaanni umiarsuarmi maskinistinngorniarfimmi ukioq ataaseq ilinniartoqarsinnaavoq. Umiarsuarni 3000kW tikillugit maskinmesteritut umiartorsinnaalerluni.